شاعر مهجري
ـ1ـ
شعرك حلو
مجانين.. سمّيتو
عَ إسمهن هنّي
اللي دمّروا الجنّه
شعرك كتير كتير حبيتو
وبتحب تعرف ليش؟
رح خبرك.. من يوم ما قريتو
عرفتك بحبر الدمع خطيتو
مجانين.. ع إسمن
ع اسم هاك الجان
الما عندهن إيمان
قريتو عشيّه ونمنت
والصبح لمّن قمت
حسيت يا شربل.. معي
نام ع صدري ووعي
لبنان..
ـ2ـ
مجانين عنّن قلت..
هالدمروا
وما عمروا
ووجّن بلون الزفت
شياطين هودي وقلبن محجّر
زرعوا بقلب لبنان هالخنجر
حرقوا تلج صنين
وارزنا الاخضر
رحمتُن كتير كتير
سمّيتن "مجانين".
ـ3ـ
انت لبناني اصيل
ريشتك حره متل قلبك
وقلبك متل قلبي عليل
ومن هيك تا بحبّك
ومتلك بحب يعود
لبنان..
كلّو حبق وورود
كلّو شذا رياحين
تا يكبر الايمان
بقلوب هالعميان
الـ سمّيتن "مجانين".
سيدني 1985
**
عرفتك يا شربل
عرفتك يا شربل باللطف موصوف
وبالشعر بتحطّ النقط ع حروف
حطّيتني الأول بأوّل صفّ
هيدا دليل الحب والمعروف
عرفت قلبك صوب قلبي هفّ
طلعت بعيونك بدر ما لو كسوف
لكن لا تنسى عيون عم بترفّ
وبالعكس عن عينيك عم بتشوف
شعّار بتغنّي الشعر ع الدفّ
وشعّار ما بدّا طبل ودفوف
أشعارها ضدّ البرم واللف
بتطلع على المنبر رنين سيوف
في ناس قلبا للشعر مشتفّ
وللعبقريه الصادقه ملهوف
وفي ناس لو حطّيتها ع الرفّ
ورجّعت ريش جناحها المنتوف
بتعطي كسيره عنّك وبتكفّ
وبتقول فعلك فعل مش مألوف
هيك الدني.. فيها شهم بيعفّ
لو شاف خصمو ع الدرب مكتوف
وفيها ندل لولا ضربتو كفّ
بْيَدّ الوعي.. بحر الحقد بيطوف
انما قدر لَيْك عْلى البلد بيغفّ
وبيخطف النعجه مع الخروف
انجينا لواقعنا الحقيقي انصفّ
منزعّل الواجب.. منرضي ألوف
وحيث المبادي اليوم "هبّ وطفّ"
وقلال يللي متل أفضالك
بيميّزو العاطف عن المطوف
ديوان: أسرار
**
رثاء المرحوم سركيس بعيني والد شربل بعيني
ـ1ـ
ناس عم تبكي بدافع إنتساب
من بعد ما الوج الحلو من الكون غاب
لكن أنا مع مجدليّا كلّها
بفجّر عيون الشعر ع بيّ الشباب
العيلة اللي بعزّها وبجلّها
ما كنت حاسبلا لهالصدمه حساب
شوك الحزن غطّى ع زهوة فلّها
وجسر الكرامه والوفا والحب غاب
حتّى جبرها تصبّغ عليه التياب
ـ2ـ
قالوا: الدني، وعيش الهني لشخص الغني
وقالوا: شو نفع الرزق والمال الوفير
ما بين ثروات اللي جامعها الغني
وما بين بعد الحظ عن عين الفقير
وبين الجِني وبين الـ بعمرو ما جِني
منطلع حبايب عند تقرير المصير
وما زال مش معقول نبقى بهالدني
والعمر فشخه، وكلّنا عابر سبيل
ما في لزوم عْلى الدني نزعل كتير
ـ3ـ
ما منزعل ع الدني الفعلا دَني
دستورها ع الموت صرحو منبني
وكل بيّ بيترك ربوع الحياة
منشعر ع فقدو جنّحت فينا الدني
البيّ عنوان الوفا والمكرمات
خصوصي إذا متلك بِـ إيمانو غني
شو بتقدر العيله تقدّم واجبات
من بعد ما بكيوا دما وتوجّعوا
وأم الشباب عيونها عم يدمعوا
وقلوب ست شباب عم يتفجّعوا
مع نعشك الغالي الدموع بيزرعوا
تا تضل تتنشّق عطور الطيّبه
تفتّح ع قبرك ورد جوري وسوسنه
ـ4ـ
يا بي ست شباب حرّه عطيتها
صدق المبادي ونجمها راج ولمع
ع طريق المكرمات هديتها
ومشّيتها تا زهّرت بالمجتمع
من كتر ما دغدتها وحبّيتها
فوق نعشك جفنها لولا دمَع
بعدا قليله.. كتر ما ربّيتها
انفجعت العيله كلّها.. والأرمله
لا تلومها لو قلبها عليك انفجع
ـ5ـ
شربل صديقي.. مالك الطبع الوفي
صاحب قلم.. شاعر رقيق العاطفه
ما قدر من شعرو الرقيق يسمّعَك
مكسور قلبو.. والأيادي مكتّفه
الشاعر اللي منهلو من منبعَك
غصنو طري وموتك جنون العاصفه
بتعذرو.. وقلبك عليه بيوجعَك
كان بوجودَك نسر يتحدّى النسور
صارت بعد منّك رياشو منتّفه
ألقيت في 4/3/1981، ونشرت في ديوان: أسرار
**
