شاعر مهجري
يا مجدليا.. رفرفي وطيري
عليكي مصاقب التوب الحريري
عجينك طالع الريحه ذكيه
بعتي للغرب من ارضك خميره
خرق شربل جدار الجاذبيه
وسبق ابن المقفع والحريري
ولو انو ما تكون الابجديه
اخترعها شربل بمده قصيره
سيدني 1988
**
شربل ونقطة زيت
ـ1ـ
ثورة عطاء وفكر ومحبّه
خزّنتها بإنسان يا ربي
ولنو بعتلك نص دزينه
يمّا ما تبعت كنت هالحبّه
ـ2ـ
يا مؤمن وكافر بفرد نهار
وقديس.. لابس بدلة الكفّار
انحطيت كلماتك على القبّان
بيتسكّروا الاسواق ع التجار
ـ3ـ
يا معجم الكلمات.. يا إنسان
الحامل ع كفك شمعة "ديوحان"
وحامل بقلبك طهر ومحبه
بعقلك نبوغ وحكمة سليمان
ـ4ـ
هزك كلام الارض، وتمنيت
إخرق بفكرك زاويه.. ويا ريت
بقدر بشعري فلسف الكلمات
وسمّي كتابي: كتاب "نقطة زيت".
سيدني 1988
**
