شاعر مهجري في كانبرا
شربل.. بعيني كون
متلك أنا .. شلاّل
الشعر اللي دكّ حصون
الصوت اللي هدّ جبال
بقلبو.. غصن زيتون
بإيدو.. رمح ونبال
شعرو.. كرم وغصون
ضوّت بعبّو غلال
شعرو.. كنز مكنون
ما بينحسب بالمال
شعرو علم وفنون
بيعلّم الأجيال
ان صادف الحسّون
يرندح معو موّال
بكل الحلا مفتون
وشعر الحلا مرسال
متل الطفل محزون
شوقو لأمّو طال
عاشق.. بعشق جنون
تراب وسهل وجبال
شربل.. بعيني كون
متلك أنا شلال
هادر بليل سكون
يبكي كفانا دم
يصرخ كفانا قتال
البيرق، 1989
**
شعرك رائع
شعرك، يا شربل، رائع
من قلب الثوره طالع
وصوتك عَ الظلم وعّ القهر
نازل متل الزوابع
شعرك حكمه وعمق وفكر
وإحساس بقلبك نابع
وكلمة حق وصدق وطهر
بتكشف زيف الـ بيخادع
شعرك سيف بوجّ الكفر
يدافع عن حقّي الضايع
بيحكي عَ الظلم وعَ الغدر
وعن عصر الكذب الشايِع
وحاكم صلّى.. بقلبو الكفر
يتاجر بالشعب الجايع
بيحكي الضهر.. بينسى العصر
وعودو.. للشعب الطايع
خلاّ الأرض الحلوه نهر
دم.. وخوف ومواقِع
وهوّي ذاتو تاجر عهر
وأصناف من الموانع
وهوّي ذاتو دافع سعر
لقنّاص براس الشارع
حتّى الحرب تضلاّ تكرّ
وهوّي يجني المنافع
والشعب اللي صرلو دهر
الإيمان بقلبو ينازع
عايش قهر وغدر وفقر
وهم وغمّ ومفاجع
لكن طبع الشعب الحرّ
مش ممكن يبقى راكع
خيّي شربل ضلّك حرّ
بشعرك.. تالشرّ ينازع
كانبرا 1991
**
