ـ1ـ
شربل.. يا سيّدنا بيطمح للأثير
وبدّو يطير ومش عم بيقدر يطير
صرلو ع تاني جانح يفتّش كتير
وبعد.. ما حن الحرير عْلى الحرير
انشالله.. وانت بيناتنا بهالبلاد
بتزوّجو.. وبيقعد شبينو السفير
ـ2ـ
يا شربل.. كلّنا بلطفك سكارى
قبل ما نسكر بخمر الزّياره
بسيدني، كل شخص بيزور دارك
كأنّو زار من لبنان حاره
الدني بتمحل وما بتمحل فكارك
الوحي من إيدك بيمطر إشاره
بيادر شعرنا غمرت غمارك
مواسم حبّ من قلبك عصاره
عطيت كتير.. والموسم تبارك
يا سبحان الـ بيعطي بهالغزاره
مدري في قمر سهران جارك
مدري جبينك مشعشع مناره
سفير بلادنا ما كان زارك
لو ما للشعر بيتك سفاره
1990
**
رائد الشعّار
ـ1ـ
شربل.. سمحلي بكلمتين زغار
اهمس بإدنك، ع الهدا، وحاكيك
وبدل الزنابق والورد والغار
من النوع يللي بتعبدو.. إهديك
من الشعر.. يللي مسلمك أسرار
مجبور آخد منك وإعطيك
انجربت إغدي وقطّف الأفكار
معبّى السلال وراجع بلاقيك
يا فكر ما بيرتاح ليل نهار
عشقت التعب تا تريّح الشعّار
ع هالمروّه.. ربّنا يقويك
ـ2ـ
تا تكون شعلة ذوق.. شعلة نور
ع الارض ربي من السما بعتَك
إسمَك.. بيعني كتير للجمهور
وفي ناس ع اسمك مبايعتك
إسم شربل.. بالوحي مغمور
مجبور اشهد بعد ما سمعتك
شربل بصومعتو حرق بخور
وانت الشعر بخّور صومعتك
ـ3ـ
من "مجدليا".. وجوها الصافي
طليت.. لوحة شعر شفّافه
انت وعصافيرها رفقَه
قدّيش كنتو تترغلوا قوافي
قلبك ملان بالحب والشفقه
وهمك توعي الفايق الغافي
وبتضل انسانيتك دفقَه
ع الشعر.. ع الإلهام.. منضافه
سيدني 1988
**
