شاعر مهجري من كفرحزير ـ الكورة
ـ1ـ
عجيبه.. كيف خالقنا جَّبَلْنا
وعجيبه.. الأرز كيف زيّن جبلنا
وعجيبه.. كيف "البعيني" جاب إلنا
قصايد.. رصّعت وجّ السحاب
ـ2ـ
محبّه.. شربل، بقلبي بعد لُو
وعليّي لو حَكَم حاكم بعدلو
مهما يطول بالغربه بُعد لُو
الوطن بيضلّ يحسبلو حساب
ـ3ـ
يا شربل.. متل ما كنّا بعدنا
إخوه.. قد ما يطوّل بُعدنا
ومهما دهرنا عنكن بعدنا
بتبقوا أهلنا وأغلى الحباب
سيدني 1993
**
اسمعوا يا ناس
اسمعوا يا ناس.. لو شربل حكي
ولا تلوموا لو يئس أو لو شكي
شفتو عم بيبكي ع ضعف بلادنا
وحبّيت إنّي شاركو بكتر البكي
وروحي بشربل عم بشوفا مشربكه
وعم قلّها ما بريد شربل تتركي
لما بصوت المغترب شعرو قريت
تعجّبت قدّيشو لطيف وشو ذكي
صوت المغترب، العدد 846، 15 آب 1985
**
مهداة إلى الشاعر شربل بعيني
ـ1ـ
الشاعر شربل البعيني
شعرو ع راسي وعيني
رابي وعايش بالكوره
وما بفرق بينو وبيني
ـ2ـ
متلو رابي بالكوره
المعروفه والمشهوره
انشالله منروح نزورا
ونوفيها دينو وديني
ـ3ـ
ع الصدق بشوفو معتاد
وحامل صفات الأجداد
انكنّو بعدو بهالبلاد
قولولو عنّي ويني
ـ4ـ
قديش حلوه كلماتو
بتبرهن عن صفاتو
الـ متلو عاشوا وما ماتوا
انشكلوا ع الأرزه زينه
ـ5ـ
لا تفكّر إني ناسيك
جايي ع شعرك هنّيك
وشو ما بدك رح إعطيك
حاجي بشعرك تبليني
ـ6ـ
لا تحمّلني كتير كتير
أنا.. وإبن كفرحزير
قلبي لعندك عم بيطير
جوّات صدرك خبّيني
ـ7ـ
أما في عندك ردّات
عم تلمع متل مرايات
وتسكب ع قلبي ميّات
بتفرّحني وتسقيني
ـ8ـ
لعندك حابب إني روح
تا إشفي من الشوق جروح
خفّة دمّك ضمن الروح
وبعضامي وشراييني
ـ9ـ
ويا شربل زدت الرقَّه
وعطيت العالم حقّا
ويا عالِم يا مترقّى
هديني شي بيت هديني
ـ10ـ
أشعارك شو جذّابه
صوره حلوه وخلاّبه
وما دام بالكوره رابي
إسم الكوره بيكفيني
صوت المغترب، العدد 814، 22 تشرين الثاني 1984
**
ختيار
ـ1ـ
ختيار يا شربل صرت ختيار
وبعد عم بتهدي البشر أزهار
كل زهره ملوّنه بألوان
متل السحر.. ومشكّله بأشعار
ـ2ـ
ومين هللي قال صرت كبير
شب بعدك عاشق التفكير
وصاير متل حسّون عم بتطير
صوتك حلو زمرافق الأخيار
ـ3ـ
إنت وأنا بالشعر مغرومين
ما همّنا اللي دان والـ بيدين
الـ بتهمنا آراء هالحلوين
هللي عليهن للأبد منغار
ـ4ـ
بلاهن.. يا شربل كيف بدنا نعيش
ولمين بدنا نلبس طرابيش
بلاهن.. يا صاحب كلّنا دراويش
وزغار.. لو مهما كبرنا زغار
ـ5ـ
وشو رأيك بهاللي مضى والـ كان
أفضل إذا منجرّب النسيان
بِـ هالوقت بيهمّنا لبنان
وبتهمنا الأحوال والأخبار
ـ6ـ
وأفضل إذا يا شربل مننحب
وأفضل إذا نيران ما منهبّ
سماع منّي: شبّ بعدك شبّ
وبالسن مهما كبرت إنت كبير
ومهما شبت بتشبب الأفكار
سيدني 1984
**
حب الحلوين
ـ1ـ
يا شربل حب الحلوين
بيبلي القلب وما بيعين
مهما بعدنا ونسينا
مغرومين.. وعلقانين
ـ2ـ
مهما بعدنا ونسينا
روح المحبّه فينا
غلطوا اللي قالوا قسينا
عنّا محبّه خصوصيّه
لستّات اللبنانيين
سيدني 1984
**
شاعر محبوب
شربل طالع من تمّو
الشهد.. والشعر همّو
أللـه يرحملو المرحوم
ويطوّل عمر إمّو
وبيّو لو سمعو بيقوم
بيفرح فيه وبيضمّو
شاعر محبوب ومهضوم
وما مننلام انجينا نقول:
سكرنا بِـ خفّة دمّو
النهار، العدد 522، 15/1/1987
**
شربل متل شربل
يا روح بـ "بعيني" وبِـ شعرو افرحي
ولا تبعدي عنّو.. ولا ساعه تبرحي
مش بس عم يهدي البشر ورد وزهور
شربل متل شربل عم يجيب الوحي
النهار، العدد 522، 15/1/1987
**
شاعر كبير
ـ1ـ
شربل.. عم يزيد عْلى القوافي
وع شعرو الرب يعطيه العوافي
زرتو ساعتين.. وبالزياره
غمرتني اللطافه والضيافه
ـ2ـ
زرتو ساعتين.. وبالزياره
بيّن عن شطاره.. وعن مهاره
ذكي.. شاعر بيفهم بالإشاره
بِلي غيري بأشعارو وبليني
وكان الوعد.. كل الوعد وافي
ـ3ـ
بِلي غيري بأشعارو وبليني
الصداقه كاسها بإيدو سقيني
وعندو أم محبوبه وأمينه
بطهارتها وكرمها خجّلتني
وكرمها من قلب ناقي وصافي
ـ4ـ
بطهارتها وكرمها خجّلتني
ومتل إبنا المدلل عاملتني
الضيافه.. بلكمتني وحيّرتني
صرت محتار عم إمشي بطريقي
فكّر كيف بوفي بيت وافي
ـ5ـ
صرت محتار عم إمشي بطريقي
عجبني الصدق والحب الحقيقي
شربل شاعر كبير وصديقي
بشهدلو على الجرأه القويّه
ومعي بتوافق رجال الصحافه
ـ6ـ
بشهدلو على الجرأة القويّه
وبشهدلو على الروح الوفيّه
صديقي شربل ومحسوب خيّي
شعرو بينعش قلوب الخليقه
أطيب من حلاوه ومن كنافه
سيدني 1987
**
شربل المعروف
ـ1ـ
يا شربل المعروف.. شعرك هالجميل
هديّه تمينه لجيلنا.. ولألف جيل
وكل كلمه قلتها وبتقولها
بتنعش قلوب الناس.. وبتشفي العليل
ـ2ـ
كل كلمه قلتها وبتقولها
ملوّنه.. ومركّبه ع أصولها
جمعت القوافي بعرضها وبطولها
وجمعها ع شعورك وفهمك دليل
ـ3ـ
يا شربل المعروف.. قلبي لَيْك مال
حبّيت مدحك.. ضاق قدّامي المجال
بهنّيك.. متلك رَيْت في عنّا رجال
ويا رَيْت عنّا كم نبيل وكم أصيلْ
ـ4ـ
والـ كان متلك.. كيف بدّنا نعاملو
وكيف بدنا نجهلو.. أو نهملو
نبع القوافي والشعور الحاملو
ما بينقص قدّ ما منّو تشيلْ
ـ5ـ
يا رفيق الشعر.. يا إبن الكرام
بالعطاء وبالكرَم نلت المرام
بقلوبنا.. عندك محبّه وإحترام
ومرافقك حتّى على الدرب الطويل
سيدني 1988
**
مشوار
ـ1ـ
يا شربل.. شو جميله هالهديّه
من قلب الوفي وروح الوفيّه
حافظها معي تذكار منّك
طابعها على روحي الشاعريه
ـ2ـ
حافظها معي تذكار منّك
مهما غبت بتنوب عنّك
ومهما صار ما بيخيب ظنّك
هديّه جمعتها بكتاب هادي
ومهدى من رجال العبقريّه
ـ3ـ
هديّه جمعتها بكتاب هادي
كامل في يقيني وإعتقادي
عنّك للبشر عطيت شهاده
ولو ما جَدّك.. ولو ما فعالك
ما صارت الطبخه مستويّه
ـ4ـ
لو ما جَدّك.. ولو ما فعالك
بالي ما ارتاح وراق بالك
يا شربل ربّنا يكتّر متالك
كريم الأصل بتحب الخليقه
بتكرمها غبيّه أو ذكيّه
ـ5ـ
كريم الأصل بتحب الخليقه
لأنك حامل عواطف رقيقه
وهمّك للبشر تهدي الحقيقه
وهيدي موهبه بهنّيك فيها
وعطيّه.. وشو جميله هالعطيِّه
ـ6ـ
هيدي موهبه بهنّيك فيها
الـ خلقنا لكل واحد ما هديها
قلوب الناس.. كم شعرك رويها
وعم بيرافقك كم ألف واعي
قلبو صادق ونفسو أبيّه
ـ7ـ
عم بيرافقك كم ألف واعي
بيروح الصدق صاير عم تراعي
يا شربل من إلهي لاك داعي
بالتوفيق.. وانشالله الكرامه
تبقى في ديارك سرمديّه
سيدني 1988
**
خيّال
يا شربل ريّح بالك
ولا ترد عْلى هالأطفال
شايفها الشمس قبالك
والشمس شافوها خيال
عم تشهدلك أفعالك
خيّال وأفضل خيّال
الواوي ما قدر يطالك
الواوي رح يبقى واوي
وشربل رح يبقى رجّال
صدى لبنان، العدد 648، 30/5/1989
**
كونوا متل شربل
ـ1ـ
شربل صريح.. وسامع من السامعين
بينحبّ وبينعدّ خير العاملين
بيشفق ع شعبو كل ساعه من النهار
مجبول قلبو بالعواطف والحنين
ـ2ـ
كونوا متل شربل كبار مشجعين
وخلف التآمر لا تكونوا راكضين
حلّوا المشاكل.. نوّروا هالجاليه
وباركوا الأديان دين بضهر دين
ـ3ـ
وقلبي متل قلبك على الفرقه حزين
ما بتنمحى من فكارنا هاك السنين
وان هديت الحاله ورحمنا ربنا
إنت وأنا لبيروت بكرا راجعين
ـ4ـ
شربل بينعد من أكرم شباب
وأهل الصحافه بتحسب لشربل حساب
الـ بيكرّمو بيكون من أهل الكرم
الـ بيهاجمو.. أفضل يعيش بلا تياب
صدى لبنان، العدد 644، 2/5/1989
**
